地鐵股東會議程簡單 - 李八方

蘋果日報 2002/02/19 00:00


全港擁有最多股東嘅地鐵公司噚日舉行股東特別大會,雖然事前講明冇茶點招待,但都有約八十名股東捧場,其中包括持有一手的八方。今次股東會只有一個議程,就係通過修改公司章程,日後股東可選擇收取財務摘要,或者透過公司網頁獲取財務資料,以代替整份年報。八方同地鐵方面傾起,由於地鐵股東多達五十六萬名,若唔使寄年報,一年可節省四百萬,重唔使斬咁多樹。
可能由於噚日嘅議程簡單,地鐵只派出公司秘書及一名董事主持,主席蘇澤光及新任財務總監梁國權並無現身。八方見到嗰位鬼佬公司秘書杜禮面對數十傳媒,仍堅拒開金口,樣子相當趣致。
八方事後同地鐵中人問起,原來地鐵喺本月二十八日公布去年全年業績,所以杜禮對記者的提問只能堅持拒絕置評,否則便犯例。
﹙圖﹚地鐵公司秘書杜禮(左)全程緊閉金口,原來驚犯例。旁邊係律政經理馬崇禮。


E-mail:[email protected]