屢與廉政公署交手、有「廉署剋星」之稱的大律師艾勤賢（Kevin Egan），因食道癌復發，昨晚在瑪麗醫院病逝，終年70歲。得知師傅病逝，法政匯思召集人、大律師蔡騏非常傷心，稱近期曾與對方聯絡，但師傅未有透露病情及即將要做手術，稱從師傅身上最大收獲是學懂「integrity（誠信）及義氣」的重要性。

蔡騏回覆《蘋果》查詢時憶述自己因成績不算優異，當年見習要找「師傅」時遇困難，後來膽粗粗寫信給艾勤賢，希望對方作為自己的師傅，「結果佢叫我去見佢，喺個court見，五分鐘就見完，佢話叫我返工啦。我仲問係咪請我，佢話yes，我心諗：點解咁容易？」他稱事後沒有問對方為何肯請他，「可能佢係幾靠直覺嘅人」。

蔡騏指這位師傅極有義氣，「搵佢幫手佢就會幫手，收咗個case就會出盡力去做，唔計辛苦，夜麻麻又會去警察局做保釋，唔覺得係『下欄嘅』、junior嘅工作」，又指自己認許為大律師（call bar）後，「好大駛費亦未必有case...我都冇畀晒全部嘅chamber fee，佢（艾勤賢）當時係share咗佢間房畀我，所以我有幾年喺佢間房（做嘢）。」

他指對方是一個重視身教嘅人，「會做畀你睇」，當年蔡騏每朝會先到對方家裡共晉早餐，期間討論案件，當日處理案件後，艾勤賢又會講述處理手法，「佢會好主動咁教你：點解咁做？點樣問啲人」，形容師傅非常樂觀及風趣，「完全冇架子，好好人」，「04年佢坐監時，當時佢都冇話委屈同話冤獄，都幾postiive，又叫我幫手睇住間房，佢嘅回信都有講笑，令我唔好咁擔心佢嘅生活。」

雖然兩人近年較少接觸，但蔡騏指傘運後考慮加入法政匯思前，曾諮詢對方意見；早前也因唐琳玲事件與師傅通訊，指對方沒有也提及病情或要接受手術，「佢係一個唔係會將唔開心同麻煩嘢話畀人聽嘅人，會解決咗先話畀人聽」。