每當有當打球星投奔中超，好多輿論都會批評佢咃為咗搵人仔放棄大賽榮譽之餘，連國家隊席位都會因為無法取代教練認同而「被消失」。不過，廣州恒大中場荷西保連奴就係最佳反證，因為呢位今晚極有機會喺亞冠盃正選上陣對東方龍獅嘅巴西中場甚得國家隊新帥堤迪歡心，近六場世盃外踢足五場，難怪早前同恒大續約至2020年底嘅佢，日前接受巴西《環球體育》專訪時都表明心迹想繼續留隊！

保連奴當年由熱刺加盟恒大，被好多人視為「降呢」，但佢就自評喺呢度表現更出色：「我喺中超重新建立信心，球會擁有好好嘅基礎同專業態度，亦係國內班霸，而且越嚟越多好球員加入中超，好似奧斯卡杜斯山度士同泰維斯等。另外，堤迪會關注每一個聯賽，因為巴西嘅好球員遍佈世界各地。」雖然呢位喺國內被稱為「暴力烏」嘅巴西中場坦言對今季中超收緊外援限制感到驚訝，但佢表明短期內冇離隊意向：「我冇打算離開，而且我最近先續約至2020年，只會嘗試保持最佳狀態；當然，目前冇人喺國家隊能夠穩佔一席位。」