楊:內地基金減持保險股對後市有乜影響?而你哋又睇好邊個板塊?
黃:基金只係第一季減持,但唔知會唔會當呢啲股份跌到落低位時重新吸納。如果內地股市有機會回穩或者開始向上,一眾保險股相對內地銀行股落後,加上早前佢哋公佈嘅保費收益增長唔錯,所以如果A股回穩,保險股有機會追落後。
姚:香港地產股相對落後,雖然有話樓市回調、業主劈價,地產股已經反映呢方面因素,近期長實(001)、恒地(012)或者係新地(016)管理層都有增持股份,信置(083)亦有回購。
楊:𠵱家咁悶嘅市,有乜嘢股份可以突圍?
黃:建議中鋁(2600),股價相對其他金屬類股份較為落後,但成交開始活躍,加上之前擔心成本上升會對佢盈利構成壓力,但有關因素已經喺股價上反映,唔好忽視母公司之前作出多個收購,未來可能有注資行動。
姚:博A股升,買A50中國基金(2823)唔好處係溢價越嚟越多,不如博光大控股(165),嚟緊佢會將光大銀行同光大證券上市,如A股估值做好,對佢有幫助。