曾經話過「好愛好愛好愛好愛好愛好愛好愛」千語BB嘅林峯，因為長駐大陸拍劇，兩個月冇見女友，甚至有指林峯爸爸、有「廈門李嘉誠」之稱嘅林華國唔接受千語BB，而千語BB亦已經搵到新富商對象，令到呢段5年情傳出分訊。（新聞連結： http://bit.ly/2rYJnvy ）

千語BB同林峯喺月初都以「不是事實的，一概不需作回應」否認情變。但日前千語BB喺灣仔買遊戲機仍然係單拖，跟手約女友人食米芝蓮，但都係唔見林峯喎。

其實千語BB今年先23歲，又靚女，所以好多工作搵佢出trip，好似上個月獲珠寶品牌邀請，出席第70 屆康城影展。今個月初，佢就同劇組報到，準備拍一套叫《殭屍來了3》嘅網絡電影。

工作之餘都要放鬆下，雖然見唔到男友林峯，但就約到時間同老友馬天佑見面，約咗一班人慶祝馬天佑生日。連生日party都有時間去，咁嚟緊抽少少時間見下林峯，睇怕都唔係好難啦。