【新增動新聞】

轉會窗完結，利物浦亦遞交歐聯25人大軍名單，鬧轉會嘅中場菲臘比古天奴走唔成，所以繼入選英超名單後，入選埋歐聯名單都好合理，反而落選者就有個估唔到嘅名。

尼達利基尼上季踢足37場英超，全季都好健康。直到今季季前，紅軍嘅第一場熱身賽對燦美爾，基尼都有後備上陣，然後就一路冇出現喇。嚟到香港嘅時候，基尼都有隨隊，不過當時冇落場，而當時領隊高路普有講過呢位英格蘭國腳嘅傷就快好番。

不過，開季後紅軍一路由阿歷山大阿諾特同祖高美斯兩個後生仔踢右閘，基尼就無影無蹤，直至今日紅軍交歐聯名單，連預計要唞到12月嘅中場拉爾拉拿都有份，反而基尼榜上無名，換言之即係12月中歐聯last一場分組賽前，基尼都大有機會仲養緊傷。

當然啦，另一個問題係紅軍只得法拿根一個青訓球員，基本上要喺拉爾拉拿、丹尼艾格斯、拿沙馬高域同尼達利基尼四個長期傷兵或者瀕臨被放棄邊緣球員下揀一個，最後領隊高路普就揀左可能12月前復出嘅拉爾拉拿喇！