38歲林雅詩早前傳出婚變，再次返娛圈發展，老公溫文英更被影到當街啜女，事後林雅詩自爆同老公已分房瞓5年，疊埋心水搞離婚，點知林雅詩原來同江湖猛人「沙田Me」翟浩琛最近行得好埋。

今日有周刊稱二人已同居，出入亦多咗人「護駕」，出騷排場十足，林雅詩上個月尾撐完朋友場，同傳媒講自己要去上海工作，其實佢去咗越南陪電影「弘武電影公司」老闆馬天樂，又話佢哋返港時隔咗幾個身位，期間行行下，林雅詩向疑似馬天樂發脾氣，男方轉身笑笑口幫佢拎嘢，但林雅詩就仲未嬲完，去到停車場，林雅詩就企埋一邊煲煙。

佢哋返咗去大角咀寓所，未知係唔係見林雅詩嬲爆爆，喺車廂纏綿兩粒鐘，又挨又錫，更有兩分鐘烏低個頭喺男方司機位，當時已經係凌晨兩點，難怪林雅詩同馬天樂放下戒心，據知馬天樂係猛人「沙田Me」嘅下屬。

早前林雅詩簽畀「弘武電影公司」時，已經有傳佢同猛人同居，不過佢當時口窒窒否認，原來佢所屬嘅娛樂公司，「沙田Me」亦係其中一個老闆，當時「沙田Me」都有低調現身，由於「沙田Me」唔想出面，先搵馬天樂做老闆，報道又指，早喺9月已經有人爆料，佢哋去台北旅行。