成日俾網民笑佢陣「亞視除」嘅陳展鵬，今晚可以話係喺台慶搶晒鏡——大佬呀，俾人吊起360度轉（扮）打鼓喎，七情上面咁，真係面皮薄啲都做唔到。

其實大家有冇留意陳展鵬著鞋唔著襪，同埋佢行紅地毯時嗰個Look，都係呢句——面皮薄啲都著唔到。但係，情人眼裡出西施，喺單文柔眼中，陳展鵬無論點，都係型。

單文柔接受傳媒訪問時話：「我有喺後台睇佢打鼓嗰part，我覺得佢好型呀！」唔驚危險咩？「應該唔會危險嘅。」不過自己暫時只係學舞，唔使學打鼓，「將來有需要嘅時候我會請教下佢，點樣可以調轉個人嚟打鼓，個樣都可以咁chok？」

更多娛聞，喺晒《娛果》
http://fb.com/appledailyent