舊年劉德華喺泰國拍廣告唔小心墮馬受傷，休息逾半年傷癒復工，華仔好積極咁計劃工作，除咗會喺年尾舉行聖誕、跨年檔嘅演唱會之外，喺電影方面亦都有連串計劃。

「寰宇娛樂」宣佈將會開拍《掃毒2》同《拆彈2》，將會喺暑假開拍《掃毒2》，除咗古天樂等原有班底演出之外，劉德華仲會加盟演出兼擔任監製，同時華仔亦應承咗演出《拆彈專家2》。

製作費方面，《掃毒2》將會喺香港同菲律賓取景，為咗加強動作場面，亦會加碼超過二億港幣製作費。喺下個禮拜舉行嘅香港國際影視展2018，《掃毒2》同《拆彈專家2》概念海報相繼曝光，喺《掃毒2》嘅概念海報中，由白粉併成嘅左輪手槍，有三位男主角對立嘅剪影，除咗華仔同古仔，之後再會有有重量級卡士加入。

《掃毒2》同《拆彈2》嘅導演邱禮濤，佢話只係原有題材不變，其他將會係新角色、新故事，基本上同上一集係冇連貫性，但係華仔喺《拆彈》嘅角色已經死咗，唔知喺第二集佢又會以乜嘢角色出現呢？主席林小明就話：「呢套戲預計喺19年開拍，o依劇本努力創作中，大家拭目以待。」

精選娛聞，喺晒《娛果》
http://fb.com/appledailyent