許冠傑一連三場紅館演唱會噚晚(周五)開鑼，準時八點半開騷，全場爆滿。開場時見台上垂著白布，以銀河主題，拉開白布後，見到有隻UFO吊咗喺中間，著住著燈衫嘅Sam就坐喺上面唱歌。唱完後Sam緩緩吊落嚟，由工作人員幫佢除燈衫，原來件衫裡面衫冇拉拉鏈，令Sam不小心騷肌肉，佢即笑笑口謂:「咦，我都唔知冇拉拉鏈。」

阿Sam著好衫後再唱，又多次台邊同fans握手，錫面錫嘴。但頭四歌似未開聲，之後Sam話:「唉，我都未正式同你哋錫，你哋就咁熱情，不同繼續啦!」唱唱下有女fans衝上台攬住阿Sam，阿Sam仍專業地繼續唱，唱完之後由保安拉走佢。

好喇，終於等到Ella官恩娜出場，露背白長裙，此look係由馬榮成成設計，似足《風雲》嘅楚楚。兩人合唱一曲《印象》，唱畢，阿Sam請大家:「俾多掌聲Ella!十年前我睇電視，見到一個唱得非常非常好，非常靚嘅女仔，所以請佢做04年繼續微笑女主角演唱會女主角。過咗十年，佢歌唱好了咗，又靚咗。」之後兩人再合唱《常在我心間》，Ella更變身短裙仔上陣，繼續與阿Sam共舞。

到個唱中段，阿Sam說:「最近我哋失去咗演唱會教父張耀榮先生，佢對樂壇貢獻功不可抹，所以我特登唱呢首歌向佢致敬，希望佢聽到。」之後就唱出《每當變幻時》，此時電視播出耀榮叔生前與群星合照，場面感人。

緊接再由阿Sam兩個兒子:懷欣同懷谷及徒弟Justin一齊表演唱《Whatawonderfulworld》，阿Sam話:「呢首歌旋律有啲似我另一首歌，我覺得作呢首曲時受影響，潛意識抄咗都不知。」原來呢首歌就係《鬼馬雙星》。然後輪到欣宜出場，合唱後，Sam落台換衫，欣宜同Sam兩個仔及徒弟唱《父母恩》，欣宜話送俾台下所有父母，電視又播出欣宜與肥姐母女及阿Sam三父子合照。

除咗兩個仔，Sam就連新抱Ida都請埋出場:「佢係一個好cute好cute嘅新抱，不過第一次上台表演。」又讚新抱唱歌好聽，兩人合唱《無敵是愛》。到表演香港情懷一節時，阿Sam話:「好多謝馬榮成先生，以下播出《鐵塔凌雲》MV，都係由佢畫。」馬即起身鞠躬回禮。

十時四十分，倒數encore時間，許冠傑共encore咗13首歌，臉不紅氣不喘，穿豹紋look，坐哥爾夫球車，手持噴氣嘅噴槍沿住四面台周圍噴。唱《最緊要好玩》時更索性下台，四面行握手。

唱《夜夜念奴嬌》時，有女fans捉實阿Sam唔放，想錫面，令Sam幾乎失足跌落台邊。