中文大學繼2013年舉辦「殿堂演藝之夜」、2015年舉辦「九五之尊籌款之夜」後，上周五亦舉辦「星星相惜中華文藝之夜」，喺會展筵開逾140席，唔少殿堂級藝術家、政商界中人及師生校友粉墨登場為中大籌款。

粵劇名伶陳寶珠同梅雪詩表演《蝶影紅梨記》之窺醉，令觀眾如癡如醉；有AO歌王之稱嘅前常秘、現任廠商會CEO楊立門夥樂樂國樂團，帶嚟中樂及經典金曲表演；唐英年媽媽唐尤淑圻、前常秘李麗娟、律師會副會長彭韻僖及黃宜弘等更合力炮製《夜上海》舞蹈表演，賓客拍爛手掌。

除咗表演項目，林李翹如博士仲捐出一枚鑽石蝴蝶襟針即場拍賣，由陳煒文以150萬港幣投得。晚宴最終為中大籌得逾4千萬港幣，款項會用於支持中大發展及教育經費，尤其喺弘揚中華文藝、培育學生領袖等項目。