地鐵（066）噚日復牌高開近10%，報21.50元，黑客話見唔少散戶趁高沽貨，其中有唔少係碎股（估計是地鐵上市兩年向散戶派送的紅股），反映有好多長情股東已與地鐵分手。
經紀行普遍認為兩鐵合併對地鐵有利，但就認為地鐵股價已偏高，大摩叫客戶減持，摩通叫股民獲利回吐，但阿虎聽聞歐資對地鐵仍然興趣甚濃。事實上，唔係間間證券行都睇淡地鐵股價表現，好似瑞信就調高地鐵目標價至24.50元。

地鐵具REITs概念

地鐵收購九鐵物業權益後，將擁有價值達200億元的投資物業，市場揣測地鐵日後或有分拆REITs上市的行動，利好股價。地鐵收報20.80元，升6%，成交達10.2億元，市值增至1140.3億元。
紫金（2899）噚日除淨（10送10紅股），亦即係變相1拆2，股份拆細後，股價一度彈升27.6%至4.45元，其後有回吐，升幅收窄至5.42%，收3.675元，成交4.05億元。
雖然金價持續在600美元高位徘徊，但紫金冇理由會升近3成咁癲，同類股份靈寶（3330）最勁都係升過10%至6.20元，埋單仲係冇起跌。睇嚟股份拆細真係可以令隻股鑊氣大增。
港交所（388）跟隨大市回吐，跌4%至55.75元，只較高位59.70元下調6.6%。去年底至今，港交所累升逾8成，現時調整幅度實在輕微。
據持有港交所的芬佬朋友話，市場可能會重估港交所價值，皆因現時港股市值逾9萬億元，每日平均成交額僅300-400億元，約佔總市值的0.33-0.44%，實在不成比例，港股每日平均成交額升至1000億元水平，才是一個比較合理水平，所以港交所唔算位高勢危云云。
阿虎