噚晚千嬅舉行尾場個唱，除咗黃偉文突然神秘現身外，與千嬅份屬好友嘅林海峰（Jan）亦現身舞台。

事緣千嬅唱完《少女的祈禱》，開始另一Part時，當播起音樂時，Jan突然升上台，由於當時燈光唔同咗，千嬅亦不禁擰轉面望下發生乜事，當佢見到Jan時，一臉驚訝：「嚇死我呀，你唔係生日放緊假咩？」Jan則謂：「因為我好想睇你演唱會，今（昨）日問工作人員仲有冇飛，工作人員話爆晒，咁我嚟到，就推咗我上嚟。」

Jan表示早前同千嬅合作電影，大讚千嬅演技佳，係一個好演員：「同千嬅拍黃修平套戲，嗰晚要拍嘅時候，個副導演走埋嚟同我講，話導演要拍晒千嬅戲份，我問要等幾耐，副導演就話其實我可以返屋企先，我係專業演員，所以喺現場等，我目睹導演要求千嬅喊三次，第一次就好濃﹑第二次唔好咁濃﹑第三次係好濃同唔濃之間，導演同千嬅講完，千嬅匿埋兩分鐘，埋位時喊出真眼淚。」

千嬅聞言即說：「呢個係互相帶動，好Surprise你真係嚟咗。」之後Jan返落台，千嬅望住台底，同Jan講生日快樂，佢話：「之前真係請過JAN，但佢放緊假。」

之後千嬅喺台上再講拍戲感受：「笑係一種態度，喊係一種情緒，喺兩分鐘入面，冇乜神怪嘢，我回憶自己過去，好似冥想一樣，係一件幾殘忍嘅事。」講到就快到自己生日，千嬅表示：「以前生日好興奮，會諗下去邊度玩，0依家生日就諗起生仔，覺得媽媽好偉大。」