近日韓國演藝圈爆出「#MeToo」風暴，唔少資深男星都被指涉性騷擾、性侵，當中賣座韓片《與神同行》嘅49歲男星吳達洙亦捲入是非，吳達洙沉默多時後發聲明道歉，而佢於《與神同行2》嘅戲份全被刪走。爆出性醜聞後，吳達洙就返到釜山居住。

事隔近月，有韓媒搵到吳達洙受訪，透露其近況。吳達洙表示事發後一直冇食慾，幾乎只靠飲米酒度日，佢又透露：「有朋友指責我太遲作出回應，但突然成為『#MeToo』嘅對象令我大感費解，我驚所講嘅每句說話都被輕率地報道，而且因為已經係20年前嘅事，為咗可以更清楚地發表立場，所以花咗更多時間去憶起過去嘅記憶，就成為所謂嘅『沉默』。」

吳達洙於是次訪問中多次否認自己曾性侵及性騷擾，稱係雙方同意之下發生嘅關係，被問到點解發聲明道歉，吳達洙表示：「如果對方喺呢件事上感到痛苦，我應該為此而道歉，因為雙方嘅想法可能有唔同。」隨後吳達洙公開與指控佢性騷擾嘅A某及話劇女演員嚴智英當年相識嘅經過，最後再向兩人、受影響嘅作品、電影製作公司及工作人員道歉。

另外，一名李姓男諧星被B小姐指控性侵。B小姐本月6號曾受訪指控於2005年喺男方家中遭對方性侵，B小姐憶述當時已經拒絕與男方發生性關係嘅要求，卻被男方性侵，又指男方以「兩人正交往」為藉口掩飾罪行。

而B小姐今日再喺網上發文指責李姓男諧星以及其後輩C某，要求兩人道歉。B小姐寫道：「公開被性侵一事後，佢同佢後輩反而話我係花蛇(喻指用美色誘取錢財嘅女人)。李姓男諧星曾反駁指以為我已經成年，但當年我認識佢與C某時，兩人分別僅20歲及19歲，同場其他女生包括我在內，仍稱兩人做『Oppa』，所以佢冇理由唔知我尚未成年。」B小姐又指受到性侵後，覺得自己好污糟，同時大感晴天霹靂，更諗過想死。

更多韓流，喺晒《娛果》
http://fb.com/appledailyent