噚日朝早11點幾，23歲南亞裔司機揸貨車沿連翔道向荔枝角方向行車，37歲姓陳男子揸住架Tesla喺貨車後面，去到差唔多港鐵南昌站對開嗰陣，懷疑有人想切線導致兩車相撞。兩架車打白鴿轉鏟上南昌站對出路面，貨車撞到掉咗頭，撞落車站外牆柱躉同埋月台一列玻璃幕牆，8塊落地玻璃爆裂。

月台婆婆嚇到跌落地

讀者杜小姐當時就喺往東涌同迪士尼綫嘅月台等車，突然聽到好大聲，初時仲以為一部駛緊入月台嘅列車出軌，但見列車正常埋站，再擰轉頭望吓先知原來後面嘅玻璃爆晒，有個婆婆本來坐喺月台入面靠近玻璃幕牆嘅長凳，佢嚇親跌咗落地，仲未知發生乜事，杜小姐即刻走上去扶起佢，好彩佢冇受傷。
現場遍地玻璃碎同組件殘骸，港鐵職員同警員封鎖現場，兩個司機坐喺路邊協助調查，貨車司機同Tesla司機分別胸口同背脊受傷，之後送院治理。警方列做交通意外有人受傷處理，港鐵發言人話事件冇影響車站運作同列車服務，亦都冇收到乘客受傷嘅報告。