㗎仔個市昨日早段唔見咗700幾點，港股亦係一開就唔見咗700幾點，其他區內嘅股市都跌得好慘，點解？唔使問點解，因為前晚花旗個市仆咗落嚟，道指唔見咗400幾點。
美股點解會跌咁多，傳媒話係A股跌市嘅結果，俊樺唔係幾同意，雖然話祖國嘅國際影響力已經今時唔同往日，但係講到股市嘅影響力，同美國佬仲差好遠，前日A股跌得多，美股又跌，只能夠話係「觸發」美股下跌嘅「藉口」，而唔係一個「原因」。搞清楚呢樣嘢其實好緊要，因為如果大家以為兩個股市跌有因果關係，咁就大件事，容乜易見到A股升就買定貨，等當晚美股急升帶動第二日港股又急升，呢種諗法好有創意，但並唔係事實。
「物先腐而後蟲生」，美股要跌，係因為已具備跌嘅條件，跌得多，係因為已具備大跌嘅條件，要跌嘅時候，乜嘢都可以成為藉口，好消息都可以當壞消息炒，呢啲就叫做股市嘞。

4日加埋恒指已經跌咗1156點，跟住會點？應該係反覆向下，每次反彈都係造淡嘅好機會，19000關唔係有力嘅支持位，睇怕呢個月唔見18000都要見18500。
恒指P輪2122：昨晚美股如果反彈，今日港股開市都會彈，但係港股後市睇淡，可以設定兩個策略入市揸啲恒指P輪。今日恒指反彈之後如果喺高位遇壓掉頭，可買恒指P輪2122，如果昨晚美股繼續跌超過100點，港股應該會低開，咁就可以即刻追啲2122，2122槓桿11.8倍（有效7.7倍），對沖值0.59，指數跌落19000同18000，隻輪應該分別有27%同76%升幅，指數升破20400止蝕。