當年今日

連年盈利穩增
股路縱橫:第一電訊持得過

蘋果日報 2002/06/10 00:00


上周末同「芬佬」茶敍,講到大市走向,有人話早前問過一位大師,佢話未來呢兩個月,個市會好唔掂。原來呢個「預言」,在座唔少人都聽過。呢位大師,在金融圈頗負盛名,佢話農曆5及6月呢兩個月,係今年最差嘅月份,港股會受突發事件影響,失驚無神咁大跌,至於會跌到邊一個位,天機不可洩漏喎!
聽日就踏入農曆5月,大師嘅「神機妙算」靈唔靈,兩個月就知道。其實,呢輪大市已經由強轉弱,由12000回落,又去番250日線水平,呢個位「牛」完之後再落,恒指真係有機會跌到10500,咁嘅走勢好差,大市會繼續尋底,但會唔會跌到落9000,天曉得!
大市在50日同250日線呢個水平,定唔定得住,真係好關鍵,若企穩之後又重上10日同20日線,則可以話調整完成,正式「吻別」250日線,後市將會大升。筆者較偏向睇好,但跌穿11000止賺?蝕。

基金股值10倍PE
現階段炒股唔炒市,上周五逆市而升的第一電訊(8110)有消息,可留意。第一電訊主要經銷10個牌子的手機,雖在創業板上市,但以營業額計,「晒士」最大。2001年度(12月結),營業額53.3億元,上升71%,售出430萬部手機,增95%,獲利1.63億元,升13.1%,每股盈利9.3仙。過去3年,集團共獲利3.59億元,已有條件在主板上市。
今年集團再獲得7個新型號手機分銷權,首季營業額12.5億元,升21%,獲利4592萬元,升24%,每股盈利2.62仙。期內銷售100萬部手機,經營毛利9900萬元,更上升47%。估計02年度盈利可上升至2.3億元,每股盈利13.2仙。第一電訊係基金股,以保守10倍PE計,年底股價可見1.3元。
第一電訊上周五收0.9元,升3仙,已回升上10日及20日線之上,暫時較大阻力在50日線0.96元水平,整固後再上,短線可挑戰3月高位1.16元。
郭兆誠