惠英紅(小紅姐)噚晚喺銅鑼灣搞咗個冬至飯局，請咗導演葉念琛、羅耀輝、陳果、文雪兒等，與及一班傳媒食飯，紅姐透露好友鍾慧冰原本都出席，但係天氣轉冷導致脈管炎發作令到腳痛，入咗院半日，好彩已經冇事出院。

啱啱攞咗金馬影后嘅小紅姐心情特別靚靚，開心滿場飛，問到佢花咗幾多位數字請客？小紅姐話：「唔好講錢，今次係請啲麻雀腳，家人同大家做冬。」本來冬至要返大陸拍戲，不過因為佢嘅戲份延期拍攝，所以就有假放，可以喺香港過聖誕，小紅姐話：「之前趕拍《翠絲》，日日拍通頂，因為諗住趕住返大陸開戲，不過o依家改咗下個月先返去，所以聖誕喺香港過，會打麻雀。」紅姐笑言自己打麻雀唔會博命，只係玩下，向有「魚腩」稱號嘅小紅姐笑話：「所有人都鍾意同我打，我10次有9次都輸，我技高運低，好少輸過萬，都係幾千。」佢仲話要多啲打麻雀，因為都擔心遺傳媽媽嘅認知障礙，但就唔敢正視去檢查。

問小紅姐點解唔自己去旅行睇吓碰唔碰到艷遇？小紅姐直認好恨拍拖，但就唔會自己去旅行，佢話好多時被誤解以為要求高或者想搵富豪做另一半，佢話：「我唔使，我已經係半個富豪！是但啦！細妹嫁唔出就最好，有人陪我。我哋兩個都習慣咗，我最多嘢同佢講，因為大家係同行。o依家搵另一半比較難，我冇太大要求，最重要心地好唔使太靚仔，但年紀一定要大過我，最好係離婚男或者死咗老婆，從來冇另一半嘅肯定係變態嘅。」

更多娛聞，喺晒《娛果》
http://fb.com/appledailyent