陳妍希今年7月同大陸男藝人陳曉喺合肥領證結婚，當時佢哋就認埋有BB，轉吓眼妍希都已經懷孕7個月，日前就有網民捕捉到佢一個人行商場，專心咁幫小寶寶揀靚衫，眼利嘅網民仲話見揀嘅衫，估計佢腹中塊肉係囡囡喎！

妍希BB自從宣佈懷孕後，一早就知道小寶寶嘅性別，但佢哋兩公婆就守口如瓶，冇向外透露過小寶寶嘅性別，話要保持神秘感。但日前就有網民喺商場發現到妍希BB一個人，仲將佢偶遇妍希BB嘅相放喺微博同大家分享。網民就話見到佢左揀右揀，好細心咁幫小寶寶揀衫仔，最後佢就揀咗一套比較粉嫩嘅套裝，就估佢將會生女喎！但係就有網民留言話，妍希BB揀嘅顏色比較中性，仔女都啱用喎！仲有網民好驚訝，就快分娩嘅妍希BB，手腳依然纖細，留言話好羡慕。