受武漢肺炎疫情打擊,尖沙嘴等旅遊旺區人流大跌。在區內經營鞋店20年的劉先生坦言,今次武漢肺炎疫情「嚴重過沙士十倍」,曾有多天出現「零人流、零生意」的情況,形容「睇唔到有明天」,鞋店隨時面臨結業。有小食店嘆疫情令生意額大跌6、7成,但仍堅持捱下去,不過為節省成本打算縮短營業時間。
鞋店店東劉先生租用現時加連威老道地舖已有12年,在區內經營鞋店則20年,他幸好遇上良心業主,經濟環境差,業主願意減租「共同進退」,「但而家共同進退都無用,呢一刻全城都無人行,我自己都想閂咗唔做,睇唔到有明天,唔知捱幾耐。」他稱現時情況已持續個多月,「最慘係全日無開過單」,每月約有一星期出現此情況。
他稱當年沙士時,其店舖「仲好生意,嗰時啲人唔知咁嚴重,又有遊客,而家嚴重過沙士十倍」,故即使附近有藥房亦無法帶動人流,「要買都買漂白水、口罩,大家都無心情買嘢,遊客亦無晒。」他稱去年示威期間生意額下跌3、4成,現時則大跌6、7成,去年業主願意減租,現時地舖月租約5、6萬元,他亦再與業主商討希望對方能再減租。
他估計若情況持續,「半年都捱唔住,個個月蝕,又要交租又人工」,店舖總成本每月約10萬元,「可以捱到幾多個十萬」,直言「我喺呢條街做咗廿幾年,第一次打算唔做」,預料隨時要被迫退休。他稱早前曾申請商界抗疫基金,順利獲批款項,「李嘉誠幫到少少,政府就乜嘢都冇,嗰8萬蚊(津貼)都唔知點申請」。
於厚福街經營「第三代肥仔小食店」近6年的老闆肥仔亦稱,今年面對最差的經營環境,自農曆新年以來,「冇晒遊客、自由行,本地人都唔多,而家都冇咩人出街」,生意額大跌7至8成,「生意最少嗰日,一千蚊生意額都冇,(較平日跌了幾多成?)嚇到我都唔記得」,他稱去年示威對其店沒有大影響,當年沙士期間雖然該店未開業,但他形容「沙士時啲人都冇咁驚,今次好少人出街」。
肥仔透露,其店舖月租約8萬元,業主願意減租一至兩成,即使仍要蝕本,但重申「冇諗過唔做,點都捱落去」,因該店經營多年,「熟客都知道呢度,如果唔做,啲伙記會辛苦」,他現時正考慮縮短營業時間,原本該店年中無休,他亦有意改為周日休息。
記者 鍾雅宜
-----------------------------
【武漢肺炎】專頁 全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》
讀果 上架