樓價在過去一年間直線上升，帶挈大角嘴富榮花園出現破千萬成交，成為全港首間、亦是唯一一間過千萬成交的居屋。對於早已供斷樓的富榮花園一手業主來說，單位廿年間升值數倍，當然是件好事，但眼見樓價升到不合理，擔憂或會重現97年般「斷崖式」樓價急跌的情況。

今年中屋苑誕生的千萬居屋王單位為17座中層A室，實用面積592方呎，建築面積694方呎，屬三房戶，以1,065萬元自由市場價售出，呎價17,990元；除呎價打破屋苑新高外，銀碼亦打破歷來所有資助房屋紀錄。

記者日前前往千萬居屋王單位，發現單位正在裝修。據裝修工人透露，單位的屬一般裝修，裝修費約50萬至60萬元，仍要裝修數月才完工。從門外可見，單位內部的地磚均已「拆晒」，牆身亦鏟去。

事實上，富榮花園於1997年樓市最高峯期發售，其後金融風暴爆發，樓價大跌，觸發大規模撻定，涉及的撻定戶多達近千伙。逾65歲的陳先生便是其中一名摸頂入貨的買家，他指，當年為了改善居住環境，便一家三口由觀塘的公屋搬入富榮花園，以170萬元綠表價買入5座一個2房單位。豈料一入市便遭遇樓價大跌，同時還要面對高達10多厘的息口，不過陳先生至今都沒有後悔入市「唔驚，都要住架麻，驚都無法子，公屋比返政府，根本走唔郁，焗住架咋。」

當年從事寫字樓工作的陳先生表示，工作多年本身都有積蓄，「計劃咗一段時間賣樓，起碼有個錢，所以果時都唔怕。」但當時供樓負擔都較吃力，他比如說「又唔使勒緊褲帶，慳啲就得，人地食漢堡包，我食方包，果陣時形勢喺咁呀麻。」

對於樓市走勢，他直言「梗喺唔合理呢個樓價，香港喺咁，樓價最貴，香港地搞點咗住就得架啦，香港地，食行唔喺好貴，最貴都喺住。」又認為如今跌勢同97年差不多，「睇個勢繼續跌機會大，樓價脫節、負擔唔起，所以只有跌先可以有所承接。」陳先生自己育有一女，但因為樓價太貴，所以女兒並沒有置業打算，他笑說「瓜老襯咪比佢囉，遲早果層都喺佢，佢又洗咩買姐。」

另一名同樣高位入市、即將70歲的何太太想法就不一樣，當年見到樓價暴跌，「果個心情，抽到又唔開心，因為太貴，揀樓果時都幾好，地方好大，一個金融風暴冧果時，想死咁濟，好慘，跌價跌咗一半都無，真係想唔要，但係無得住，焗住咪當租樓住，無後悔，有咩後悔，你要住就無咩後悔。」

時任公務員的何太太透露，當時斥200多萬元，一家四口一同入住18座一個3房單位，向銀行做足十成按，每月供款高逾2萬元。雖然人工優厚，但適逢兒子即將入讀大學，開支大增，何太謂：「果段時間又好迷離撲朔，兩個人，一份人工供，一份人工洗，一個月見一個月，真係好吃力，一份人工都係掹掹緊洗，咁你要享受就要咁，要辛苦啲囉。」

對於樓價一度飛升，屋苑更出現千萬成交，何太就直言「我睇佢(樓市)就癲嘅，但我希望佢唔跌添啦，人係自私架啦，我咁辛苦捱返黎，我想佢繼續升添，不過幾多錢都好，內心滿足，做人最緊要內心滿足。」話雖如此，但何太卻沒有換樓打算，因為單位是作養老用。

記者:葉煜燊

investMAN
For People of Style & Substance
掌握理財智慧 感受生活品味
http://facebook.com/investMAN.hk