當年今日
關於我們

用車報告:
歐寶Corsa用家報告Kenny話佢夠安全

蘋果日報 2003/06/15 08:00


「安全最重要……」
Kenny之前曾以一部萬事得323代步,但呢部歐寶Corsa卻係佢第一部擁有嘅汽車,所以對部車嘅要求可謂相當高,尤其喺安全方面,佢認為安全感能給予駕駛者有好重要嘅訊息,加上操控性強的話,響路面上行車可有事半功倍之效。「Corsa係一部純種德國小車,無論鋼水同車廂都畀到人有一種穩紮嘅感覺,就算喺被動安全上,Corsa更要比一眾日本車來得更好。因為如果要響香港以小車作座駕,安全性絕對係重要考慮因素之一,而我買車前亦考慮過豐田Echo、本田Jazz、標緻206及福士Polo,雖然我覺得佢哋對乘客嘅保護性唔差,但操控表現及外表與我要求仍有一段距離,故此再三考慮後,咪揀咗Corsa囉!」
另外,Kenny重話如果有朋友買Corsa的話,一定會叫佢哋加埋套原廠包圍,因為望落去可以型好多,兼且好似成部小跑車咁嘛!
「後排空間感強……」
「雖然Corsa嘅車廂唔係話好闊落,但於城市內駕駛已經係絕對足夠,特別係後座畀到人極佳空間感,兼且座椅承托力又高,就算長時間坐於後座,都唔會有侷促嘅感覺,而且部車嘅造車手工重一啲都唔差㖭!」Kenny笑着說。
「尾廂空間略細……」
「你問我覺得部車有咩缺點?唔……好似油箱蓋咁,每次入油前都要用防盜器啟動兩次,先至可以自動解鎖,如果你係揸開日本車的話,一定要畀些少時間適應;另外就係部車嘅A柱過粗,轉急彎時或會影響駕駛者視線。最後就係尾廂喇,可能由於要遷就車身線條關係啦!所以尾廂空間我會覺得稍為細咗啲,如果可以大番些少就好喇!」Kenny說。
「引擎輸出勁又夠靜……」
雖然Corsa所用嘅只係一台1.4公升直4偈,但Kenny最欣賞佢係一台以低轉高扭力輸出為主嘅引擎:「我曾經將呢台引擎,同豐田Echo所採用嘅一台1.3直4VVT-i偈作比較,得出結果發現Corsa嘅低轉扭力輸出,比Echo還要更出色,起步反應亦要來得敏捷順滑得多;至於耗油量方面我亦都好滿意,響一般行車情況下(連開冷氣)都只係平均每公里約$0.8至$1.0,呢個數字可謂相當理想,加上引擎設計理想及車廂隔音水準極高,故此引擎寧靜度絕能媲美中型房車,從而為車上乘客帶來一個更舒適嘅乘車環境呢!」
歐寶Corsa小檔案
新一代歐寶Corsa,係於去年7月左右抵港,而率先到埗嘅更係五門版型號;新車除賣相圓渾有致外,齊全車廂配搭及不俗性能表現,都係此車賣點之一。然而,後來代理為吸引更多用家,更引入埋三門版本,另外重為其增添跑車包圍套件,供用家選擇㖭!

小檔案(三門版)
引擎:1389cc直4DOHC
馬力:90ps/6000rpm
扭力:12.8kgm/4000rpm
尺碼:3817×1646×1440mm
軸距:2491mm
車重:980kg
2002年售價:$129,000
現時售價:$109,000
查詢:福方汽車(29888080)
用家大募集
如果你係車主,而座駕又已落地三個月或以上,無論對其是讚是彈,我哋都願意將你嘅心聲寫成《用車報告》,與讀者分享;有興趣嘅朋友,可利用以下方法與我們聯絡。
傳真:27420542
電郵:[email protected]
郵寄:香港將軍澳工業邨西駿盈街八號《蘋果日報》副刊「車天車地」版「用車報告」收。
(來信請註明姓名、年齡、聯絡方法及車輛型號)