啱啱割完盲腸嘅卿姐狀態回勇，一連走幾場都冇問題，依然中氣十足，好似佢噚日出席婦女動力基金慈善活動，戴上拳套扮玩kickboxing都好精靈。點解可以好得咁快？查實係不時有湯水補吓身咁。
咪住，卿姐啲湯水，當然唔係一般湯水，而係加埋燕窩嘅雞湯。邊個咁有心送燕窩畀卿姐補一補？原來係余大狀。余若薇話覺得燕窩最有益又方便，就買咗半打畀卿姐。原來余若薇一向冇食燕窩，因為冇時間燉喎，最後仲笑笑口加句：我補嚟都冇用。真係謙虛。