皇家馬德里王牌前鋒基斯坦奴朗拿度（C朗）驚傳今夏有意離開西班牙球壇，連埋未獲曼聯續約嘅瑞典前鋒伊巴謙莫域，兩大巨星「自由斟」確係舔舔脷。雖然外界揣測C朗下一站嚟嚟去去都係曼聯、巴黎聖日耳門、中超同美職聯等，但德甲球會哈化柏林心口掛個勇字，繼早前喺twitter以「沙律碟集郵」為由力邀伊巴，今次又搔中C朗死穴，以「柏林fans會好似對待兒子咁愛錫你」為由斟C朗！其實以兩大巨星霸氣盡露嘅風格，義助哈化擊倒班霸拜仁慕尼黑封王都咪話唔威，諗得過架！而且哈化今夏都有唔少轉會動作，連同周五宣佈簽入馬賽後衛列卻克，加埋馬菲歷基同戴菲沙爾基，已經有3位新兵駕到。

講開C朗會否返英格蘭效力，有來季回升英冠嘅保頓球迷都好關心，唔通機會嚟啦飛雲？不過，保頓官方亦好有心喺twitter回覆球迷關注，指球會未有同C朗接洽，令「假膠」fans空歡喜一場。至於母會士砵亭亦出手「搶人」，喺twitter呼喚C朗浪子回頭為時未晚咁話！