今年父親節，這個爸爸快樂不了。兒子為了抗爭運動，身涉兩案，至今已還柙7個月；同時間，太太癌病惡化，儘管兒子獲准短暫保釋趕及見母親最後一面，惟兩母子已無法好好談話。面對身邊兩個最重要的人相繼出事，他想在這個父親節隔空向兒子表白，由此至終，作為父親的他沒怪兒子，也希望兒子不要因媽媽離世而自責，「爸爸頂得住，爸爸一定撐到你出嚟」。
記者　袁楚楚
過去一年對於姜爸爸（化名）來說很艱難，他有諸般理由閉口不言，但他仍選擇受訪。「我同個仔，兩個都麻甩佬，你知啦，肉麻嘢講唔出口，有時講嘢冇咁深入。我想用另外一種方式同個仔交流 ，希望佢喺入面睇到。」
廿多年前當上父親，但他說，一家人很少慶祝父親節，「男人無咁着重呢啲」。惟他留住兒子小學時在父親節送給他的兩張箋紙，他口中雖說「個衰仔送呢啲嘢，咁多年係得呢兩張囉」，卻珍而重之將兩張泛黃、摺痕已深的箋紙，小心翼翼放在太太送的銀包，夾在一家三口的合照後面，一放就是十多年。「個衰仔，好少對我咁好，成日同我頂頸。其實大家都關心大家嘅，可能男人同男人溝通方式，都係放喺個心度。」
身形瘦削的姜爸爸穿波衫運動褲受訪，以前他有踢足球，兒子自小跟他「踢吓踢吓」，踢到入足球隊。「希望佢喺入面，都有得踢吓波，有啲細藝……最驚係佢喺入面食太多朱古力會爛牙，佢細個成日飲葡萄糖水爛過㗎啦。我成日同佢講，要早晚刷牙呀。」不論子女身在何方，「子女永遠是孩子」就是這個意思。

鬥嘴成為三人的快樂回憶

由於兒子是男仔，因此他管得較嚴，「唔啱會鬧」；但太太則錫到燶，「佢同媽咪關係好好，始終得一粒仔」。「我哋兩公婆成日頂頸，個仔幫媽咪，夾埋一齊頂吓我；有時話吓個仔，媽咪又幫個仔，兩個槓我一個」，鬥嘴成為三人快樂的回憶片段。
在他心目中，兒子品性單純，「放學去踢波，夜晚打吓機」。後來他因工傷險被捲入車底需休養、太太又罹患癌症，兒子就開始轉變，「可能自己真係疏忽咗，見到都冇去主動關心佢」。那時他受傷，心情欠佳，「有時對佢嘅態度都唔好，有一排兩父子嘅關係……唔係差，但係好似有層隔膜咁。」
姜爸爸認為，太太生病對兒子影響很大，「佢變得好多嘢收收埋埋，有乜嘢都唔講」。兒子後來放棄赴台讀書，搵工，「有時飯都唔食，沖個涼瞓醒又返工；有時做到幾日唔見他返屋企」原來是工時長，索性在公司休息。他知道兒子工作辛苦，但兒子鍾愛那份工。

媽媽叫他不要怕叫他堅強

他記得那一晚，兒子被警察帶回家搜屋，「佢見到媽咪，兩個攬住一齊喊，佢不停同媽咪道歉；媽咪都支持佢，叫佢唔好驚，叫佢堅強。」一夜間兒子沒再踏入家門。
他曾跟兒子說，「就咁遊行咪算囉，企後啲咪好囉，做父母邊有人想仔女行到呢啲位置」，他曾擔心兒子想制止他外出，亦為此事爭吵過。「佢初初只係話你唔好理我啦，有一次佢答我，你而家見到嘅全部都係12、13歲嘅0靚仔去衝，個個都好似你咁走咗去，有事邊個幫佢哋？」他語塞。
由於要照顧太太，他無法跟兒子外出。「每次佢出街，我就開住個直播，開到佢開門入屋為止」，那陣子，兒子未回家，他就無法入眠，「見佢返入嚟，我先安心啲，我先會瞓得着。」
現在，他與兒子對話，只能留在羈留中心。但他說，見面時卻好多說話都不敢說，連太太的情況都少講，擔心影響兒子情緒。「有時都好矛盾，好似好多嘢想同佢講，但係就講唔出口」，最終來來去去只說「媽咪有爸爸照顧，放心」。

兩母子也在逃避

兒子還柙逾半年，姜爸爸緩緩吐出兩個感受，擔心及傷心。「佢好錫媽咪，見媽咪唔到，我驚影響到佢嘅情緒，亦驚佢要承受各種壓力。初時見佢喺入面，佢好混亂，我好心痛」。
最初太太身體尚可時也曾探望兒子，其後次數漸少。「我都問過太太，點解唔去睇個仔，太太搖頭。我又問過個仔，點解唔寫啲信畀媽咪？個仔又肯唔寫。」他感到兩母子在逃避。「媽咪知道自己情況開始差，精神面色唔好，擔心個仔見到；個仔又唔想畀媽媽知太多，唔肯寫信俾媽咪，諗住有乜嘢出嚟返屋企面對面講。」
回到家中面對太太，又不敢將兒子情況講得清楚，「我知個仔嘅情況，但我太太其實唔係知好多。好多嘢都隱瞞、呃住太太，嗰時畀咗個希望太太，個仔會出返嚟，唔想佢咁掛心，照顧好個病先。」「兩邊都瞞，想兩邊都唔好咁大壓力，惟有係咁。」終歸壓力全放在自己身上。「又擔心個仔，但喺屋企又唔想影響太太，咪自己走入廚房囉。嗰時好辛苦、好難捱，不過而家過咗喇。」

相聚時間很短但大家也珍惜

後來兒仔得知媽媽情況轉差，十分焦急，急到沒通知律師，立即跟福利官說要向高院申請保釋，可是失敗。猶幸其後終成功申請短暫保釋回家照顧病母，兩母子相隔數月終可見面，可惜那時太太的情況已很差，無法與人溝通，只能有少許反應、微笑一下。雖然兩母子相聚時間很短，但大家也珍惜那段時光。「如果可以早一個月擔保出嚟，等佢哋兩母子仲可以傾吓偈，咁就會完美啲」姜爸爸嘆氣說。
太太最終在七日後離世，兒子獲准出席母親喪禮後，再次返回羈留中心。姜爸爸稱對兒子來說彌補了遺憾，「見過媽咪、送咗佢最後一程。之前見佢好愁，我同佢講媽媽係解脫，個仔都放鬆咗，見到佢咁我都放心啲……可能對太太嚟講係好事，佢都辛苦咗好耐喇，要抖吓，起碼知道個仔返咗嚟。」
他現時先要處理太太的後事，亦要找工作過活，「我都一把年紀，都要啲時間適應」。仔仔已托朋友幫忙介紹工作、照顧爸爸，「可能驚我一個，自己對住間屋企亂諗嘢，我之後做嘅，都係等個仔出嚟。」

望他不要自責，爸爸頂得住

兒子每次上庭，都會見到爸爸的身影。「其實我好矛盾，我都唔想去，見到個仔喺個犯人欄入面，真係好肉赤」。姜爸爸頓了一頓，「但我諗佢好想見到我，所以我一定要去，當係一種支持俾佢。佢喺入面好辛苦，我要顧及佢嘅感受。我唔緊要，最緊要係佢。」
今個父親節，一家三口只剩他的孤單隻影。他說今天會去探望兒子，「我做到嘅暫時係咁多」。他說由此至終沒怪過兒子，望兒子因今次事件學會不要衝動。
他只想藉着訪問向兒子說：「唔好怪責自己，唔好覺得因為自己令媽咪個病惡化。唔使擔心我，爸爸頂得住。照顧好自己，爸爸一定撐到你出嚟。後生仔，返到出嚟，我哋從頭嚟過。」
-----------------------------
反送中一周年，《蘋果》整理大量涉及警察濫暴濫權等資料，製成詳盡資料庫，請按此閱讀圖表版本 ／純文字版本
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
App內1-Click訂閱《蘋果動新聞》
按此了解更多