姜麗文同哥哥姜文杰，今晚出席《三面形醫》嘅結局首映，姜麗文喺劇中就係同姜大偉做父女，但現實生活中佢哋就係叔姪關係，佢話：「可以一齊拍好開心，但都好奇怪，因為劇入面叫佢爸爸，但現實就叫佢做四叔。其實我就冇緊張，同四叔合作好放鬆。」姜文杰就話啱啱同爸爸秦沛合作拍咗套內地電影，姜文杰仲話秦沛都冇鬧佢。

有傳鄭俊弘同姜麗文都有年幾冇聯絡，姜麗文就眼濕濕話：「我哋分開咗好耐，都有年幾，原因係咩就唔講喇。」

之後就背住大家，整理咗心情之後，佢再話：「你哋畀啲空間我哋，都過咗咁耐，都唔使問。」講完之後就即刻行開咗，姜文杰就即刻話：「佢諗起我個角色所以心酸啫，其實我同鄭俊弘都好耐冇見。」