10月1日國慶賽馬編十場全草地，用Ａ加三跑道角逐，上半場出馬唔多，下半場則較熱鬧。雷神莫雷拉今季表現頗飄忽，近三次賽事僅交出一Win，令捧場客大為失望，故選馬宜重馬匹實力，不宜盲目捧人。

第三場四班1200米，「歐洲巨星」來自北半球，需要時間適應，上季尾在五班取勝，採取後上戰略，今季升四班跑，竟然改變跑法，排外檔起步順利即推騎，順利切埋欄，入直路雷神輕輕鬆推打便透出贏兩馬位，取得跨季連捷，姿態有餘未盡；四歲馬現階段才踏入正軌，復課如常操練，排位朝潘明輝過檔拍跳大把在手，改用見習生減七磅，比上仗勝時仲輕一磅，憑當起之銳，跑法又好機動，應可跨季三連捷。

同場「萬里威揚」上仗亞軍唔算叻，然質新馬可以進步，復課拍跳汗濕大減，追勁增強，可望續有好演出。「包勝」受操馬身飽滿，試谷閘有前有後甚輕鬆，可爭三甲。「錶之星」有潛力，大家都期望今季可扶搖直上，試閘有好表現，潘頓肯騎絕對是爭勝分子。「靚猴王」落班配莫雷拉，但近兩仗無走勢，成熱門棄不足惜。「一支梅」快跳唔曳。「勁快步」勤操有進步。