何謂「騎師最痛」？因為自己受傷或停賽，眼白白睇住原本一手操開、騎開嘅賽駒易配，甚至贏埋。如沈拿今季就經歷過「騎師最痛」，3月31日騎「競駿飛鷹」受傷當日，原定由佢策騎嘅「天外天」易配莫雷拉輕勝3個馬位。

「騎師最痛」最新苦主係貝力斯，嚟香港發展至今只得四場頭馬，今期（8日）難得有「開心日子」同「牛角仔」兩匹惡馬，以為有望打破頭馬荒，可惜上期（5日）谷戰「自由喜」喺閘廂內起擒，弄傷貝力斯，證實右手骨部有裂痕，今季提早收爐，眼白白睇住兩匹實力份子要換人，只能輕嘆一聲無奈。

「開心日子」改配杜美爾，而第十場三班草地1200米隻「牛角仔」就換上黃皓楠，據了解皓楠一知「牛角仔」須易配後，第一時間主動尋求蘇偉賢支持，促成合作，否則此駒或落入李寶利、沈拿、杜美爾這三位今場坐冷板的騎師之手。而皓楠更有3磅減，「牛角仔」只需負118磅。

「牛角仔」抽12檔麻麻，但呢場快馬多，「美麗躍動」、「電訊驫馬」、「鑽得旺」都可能搶放，出現快步速的話，就有利「牛角仔」後上爭勝。

「牛角仔」出道至今4戰獲2冠1亞1季全上名，級數喺三班唔輸蝕，皓楠自4月24贏「愛飛一號」後一直食白果，今次貝力斯當黑，卻可能係皓楠破悶局嘅契機。

-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX