當年今日
關於我們

林家棟撐新生代電影人 不認同港產片已死

蘋果日報 2021/06/21 00:08

林家棟陳健朗手捲煙

90後的陳健朗首次執導電影《手捲煙》,戲中幾乎清一色是男角,林家棟演華籍英兵、尼泊爾青年Bipin演文尼,還有白只、袁富華、太保等,男人的世界在鬥「戲」。而電影中亦滲透不少港產片特色,黑社會的故事、不同國籍的人物、97年前的時代背景等。林家棟在圈中多年,即使在幕前、幕後位置,他認為香港電影仍未死,反而讓同行反思的是「如何令觀眾入場」。看着近年新生代的電影人冒起,家棟認為作為電影人視野要廣闊,更說︰「電影係跟住時代走,而電影就係時代嘅紀錄。」
林家棟演的華籍英兵關超,在戲中一句對白︰「唔講一,唔講三,講『義』;唔講風,唔講雨,講『雷』。」義氣與雷氣,戲內戲外林家棟都呈現出來。

關注被遺忘一群

林家棟和導演陳健朗日前接受《蘋果》訪問,談到當日監製劉國昌拿住《手捲煙》的劇本給家棟看時,他二話不說不收片酬義演,家棟說︰「個劇本最吸引我就係講一班被遺忘嘅人,喺香港呢個國際都會,仲有一班被遺忘嘅人?」雖然家棟身邊沒有華籍英兵或南亞裔的朋友,但他一直有關注他們的處境和歧視問題,「十幾年前我搵過一位導演傾偈,我有位同學住喺官涌,以前我哋成日去佢舖頭打躉,見到附近有好多南亞人,點解夜晚佢哋會流連喺嗰度?係咩問題呢?呢件事一直喺我心中,好想寫個故仔,當睇到《手捲煙》我即刻有晒畫面。」對導演陳健朗來說,不單止林家棟有「雷」氣,劇組的所有人一樣咁「雷」,他說︰「我哋係新人,佢哋喺圈中浸淫咗咁耐,對我嚟講一定有得着。」
戲中林家棟與兩位南亞裔演員文尼、文素兩兄弟有不少對手戲,大家初見面時家棟突然用粗口鬧文尼,讓他記住這種感受,家棟說︰「我同佢講,你要記住呢個感覺,你個角色就係咁。我睇劇本時,就係安排呢種歧視,令後面劇情先至融洽。我哋原本你有你世界,我有我宇宙,但竟然有個咁純嘅人出現,身處於污染世界,我衰就算,但你唔好喇!呢個唔單止係『義』咁簡單,係關愛。」

親身體會

導演陳健朗經常說《手捲煙》呈現了「男人的浪漫」,而家棟認為男人之間不用多講,只要在心中。談起1997年前後那個年代,家棟說︰「嗰段時間我全程喺TVB,一年拍100集嘢,冇乜休息過。1995年到2000年我不斷拍拍拍,連我自己都覺得有啲脫節。」回想那段狂拍的日子,還有一件事令家棟留下深刻印象,他說︰「第一場戲講嘅第一句對白︰『都係搵錢實際啲』。點解我咁深刻,記得1997年前騎住1998年,因為好多人都係財迷心竅。有次我拍緊嘢,見攝影師cut咗機就即刻睇股票機,唔止佢一個係咁,係整個氣氛,點解咁樣?點解有呢句對白?因為係我親身體驗,個個好似好容易賺錢,但搵錢就忘卻另一啲嘢。」
戲中一幕長達7分鐘一鏡過的打鬥戲,問家棟拍得感辛苦嗎?家棟笑謂︰「不如你講白啲,問我應唔應付到?哈哈!呢個時候轉做動作演員係一大挑戰,有挑戰係好事。受傷?就梗㗎啦,不過呢7分鐘好enjoy,人生中起碼試過一take過咁去做;做反派就多,打就唔算多,今次打咗我幾年quota。基本上武指先模擬一次,排晒畀我哋睇。今次設計令我好深刻,有水、有火、有電好豐富,嗰場戲比喻拯救文尼係夠力量,有邊個仲會為你赴湯蹈火呀!」家棟還笑指導演陳健朗總不愛嗌cut,在旁的陳健朗笑謂︰「家棟哥呢場戲整到眼,我好擔心,但係淨返一日,佢去完醫院洗完眼,就返嚟繼續拍。」對家棟的敬業,十分敬佩。

香港電影未死

演員出身的林家棟,從影以來演出的影視作品超過百多部,2010年他首次為郭子健執導的電影《打擂台》擔任監製,該片成為當年金像獎的最佳電影。向來喜與新一代合作的家棟,對近年冒起的90後幕後人,他有何看法?家棟說︰「時代在變,但每一日都要向前行。電影係跟住時代走,而電影就係時代紀錄。如果你要做一個電影人,睇嘢要闊啲,一定要言之有物,因為你要做一個時代紀錄。」對於新一代的新思維,他寄語說︰「呢幾年我同新導演合作唔少,明白佢哋向前衝嘅心態,但向前衝唔好貪心,一條龍骨講咁多嘢,小心生骨刺,講一樣嘢就夠啦。」談到可感到另一股電影新浪潮湧現?家棟坦言︰「呢段時間(指疫情)有好有唔好,好就係有好多新導演出現,唔好就係呢幾年嘅票房。而家嘅市道,點解觀眾睇動畫片、外國片,但少留意本地電影呢?觀眾谷極都谷唔起,點樣令佢哋入場,係我哋值得思考嘅地方。」
近年坊間經常談論「香港電影已死」,還未提問完家棟已指住旁邊的陳健朗說︰「成個喺度點死呢?好難喎!有人做,就唔會死啦!」家棟認為只要有人在,只要有人入行,就會有新東西出現。他又謂︰「我始終覺得唔同狀態下都會諗到嘢,唔可以一本通書睇到老。公平啲講,我哋點樣對觀眾先,又係呢啲題材?大家公平啲,撫心自問,如果你係觀眾你會點呢?起碼唔可以話香港電影已死。慶幸疫情下,仲有啲公司願意投資500至800萬,政府又大力鼓勵畀佢哋去試,諗多啲新嘢去吸引返觀眾,呢個先至係最重要,從而建立對香港電影信心,呢個先最實在。」
empty
林家棟認為作為電影人視野要廣闊,更指電影是跟着時代走,而電影就是時代的紀錄。
empty
林家棟和陳健朗首次合作,在疫情下完成電影。
empty
家棟笑指過往到重慶大廈只是吃咖喱角,估不到內裏也有好多東西吸引他。
empty
今次陳健朗不單止找來影帝級林家棟、太保及男配角袁富華、白只坐陣,還請來張叔平為電影做剪接,他指如上了寶貴的一課,不過家棟取笑他如「萬千星輝賀台慶」。
empty
林家棟認為只要有人在,只要有人入行,香港電影是不會死,看到如陳健朗這班新生代的電影人,寄語他們要言之有物。
empty
林家棟在戲中演一名華籍英兵,97年回歸後生活潦倒,如被遺忘的一群人。(劇照)
empty
這場打鬥戲,用音樂蓋過不少粗口的聲音,而這位特技人事後身上亦有被燒傷,幸沒大礙。(劇照)
empty
家棟笑言這場打鬥戲,已打了他幾年quota,不過他十分enjoy。 (劇照)
empty
林家棟在戲中與飾演文尼的Bipin,惺惺相惜。(劇照)
撰文︰羅婉玲
攝影︰沈健程
髮型:梁佇鳴Alex @ Salon Nova(林家棟)、WiL Wu(陳健朗)
化妝︰張楊蕊而@ J.A.C.K. Factory(林家棟)、WiL Wu(陳健朗)
場地:Premiere Elements貴賓影廳
-----------------------------
蘋果App大升級 更簡潔更就手!了解更多立即下載體驗