手工藝創作有限公司今日喺會展影視娛樂博覽舉行記者會，樂易玲、王祖藍、冼偉智、鄭斌彪等，聯同旗下藝人李亞男、陳國邦、羅敏莊、阮兆祥、羅霖、林欣彤一同亮相，祖藍首先就講到趙敬皓今日太太盧頌之生BB，與及周汶錡已預產期，所以佢哋都未能出席。

記者會上，樂易玲與王祖藍於台上chit chat，樂小姐蹺住祖藍出場，佢就先揶揄祖藍笑話今日好舒服，因為唔使着高踭鞋，祖藍就話老婆(李亞男)都未有咁做，其間佢哋亦提到剛成立工作室嘅黃宗澤亦會參與一些製作，祖藍透露，佢哋兩個唔會有太大競爭，反而係會合作。

之後祖藍嘅大細舅父冼國林同冼偉智台上亦有Chit chat，祖藍見到兩個舅父，笑指啲人會以為係黑幕組合，兩個舅父都喺度，仲話細個時見到舅父佢哋好巴閉，又開影城又盛，冼國林聽到即話：「我要收錢㗎！」

冼國林再話我哋啲藝人要共享，王祖藍即話：「吓！我老婆係我㗎喎！點共享呀？」冼國林即解釋：「我講㗎呢，係開戲，我要用你啲人，你要用我啲人。」

祖藍介紹藝人上台時，其中介紹老婆李亞男時，佢就話：「我老婆李亞男啦，不過佢都冇乜工作要做㗎嘞，主要工作就係煮飯啦！」李亞男就笑住話：「嘩！多謝老闆喎，我會全力以赴，做到最好！」祖藍就笑佢：「呢句口號十年前㗎喇！你行啦你...」

之後佢哋兩公婆就一齊接受記者訪問，記者笑祖藍咁錫老婆，只係叫佢煮飯，祖藍即話：「嘻，我雪佢呀！」李亞男好慘豬咁話：「係呀，我o依家做得唔好呀！炒飯炒得唔好就要雪㗎喇。壓力好大。」聽到老婆咁講，祖藍即刻打完場：「講笑咋，其實佢係公司其中一棵搖錢樹，佢都接咗好多大陸嘅真人騷同商演，都好賺錢㗎。不過都慶幸，太太有個好形象做招徠，最緊要係靚呀！」

講到有份投資嘅電視劇《牛魔王》自己都有份主演，出年年頭開，因為要有幾億投資，壓力都幾大，合作伙伴有興趣，對製作都好有信心，因為未放出都有人有興趣買。問到點幫老公減壓，李亞男就話：「如果佢唔使返工，喺屋企盡量唔俾嘢佢處理，等佢維持一個舒服狀態。」王祖藍即撒嬌話：「係呀，佢噚晚煲葛湯俾我飲，好感動！」李亞男就話自己第一次煲葛湯，要活生生整死條魚，劏條魚嗰陣啲血已經標晒出嚟。佢就話自己冇請教其他人，但就讚奶奶煮餸好叻。至於噚晚煲湯，李亞男就笑言冇俾其他人試飲過。佢話：「飲得落未得囉，又飲唔死嘅！」

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。