林敏驄嘅「冇有綫電視台」近日推出一首關於「便便」嘅歌──叫《屎男屎女》，係將陳奕迅（Eason）及露雲娜合唱嘅《講男講女》改歌詞，歌詞抵死啜核，內容主要講乜？之唔係講「便便」囉，阿驄接受《蘋果》訪問時自誇首歌好犀利：「繼李逸朗《傻女》之後，另一劃時代二次創作鉅獻。」

佢仲開玩笑表示知道Eason出碟，所以花咗五年時間嚟硬撼對方，阿驄又笑言唔擔心Eason嬲嬲豬：「佢玩得嘛，你唔玩佢就嬲，露雲娜識咗幾十年，不過呢個唔係露雲娜唱，係佢個妹『露蓮娜』。因為我好鍾意呢隻歌，佢哋唱功唱法非常好聽，而且屎呢個題材，每人每日都要面對，係一個非常大嘅民生題目，所以我哋會好好咁樣處理。」

阿驄又謂之前一路都唔得閒處理首歌，都呢排有啲空檔，所以就再搞搞佢：「喺facebook擺咗半晝，已經有好多人轉載，呢隻歌幾首歡迎。」

佢又鬧着玩表示，原本有打畀露雲娜：「不過佢家人話佢去咗廁所，卒之搵咗佢個妹『露蓮娜』嚟唱。」阿驄續說：「呢個係我哋『冇有綫電視台』嘅音樂台，不時有金曲重溫，因為準備舉行盛大頒獎典禮，就不時會重溫一啲動聽金曲。」

（溫馨提示：慎入﹗）《屎男屎女》youtubelink：
https://www.youtube.com/watch?v=w0Hk4vnpymw