對馬主來講，唔理質素高與低，叻唔叻都係愛駒，冇理由話自己隻馬醜，但今日（3日）新登場第二場四班1200米泥地賽，徐雨石馬房的「豹子頭」，卻同醜有關。

服役首戰的3歲新西蘭自購新馬「豹子頭」，馬主好得意團體為此駒所改的英文馬名Ugly Warrior，意思解作醜陋戰士，呢個馬主班底早幾年有個最佳配搭團體，養過「好鍾意」及「好得意」馬名好聽又識贏，為何今次改個英文馬名叫Ugly，原來取材自「豹子頭」媽媽Ugly Betty。

「豹子頭」今仗排3檔配何澤堯，此駒其實個款生得一啲都唔醜，此駒為其母第四胎，之前三胎都已經贏馬，取勝路程1000至1600米。

其中同父同母兄長「胡卡之鷹」曾於新西蘭一級賽利雲經典賽跑獲季軍，其後轉戰澳門，勝出1200米一級賽主席挑戰盃。

加上「豹子頭」曾試泥閘發揮高速跑第二，今仗一出即報泥地賽絕對有道理。