部份中產朋友對葉劉淑儀可能有憧憬，覺得佢會對類似最低工資立法等議題企硬，但葉劉接受《蘋果批》論壇訪問時嘅一席話，似乎就顯示咗呢個只係一個美麗的誤會……

主持：楊卓華

內地嘅新勞動法催化咗最近嘅工廠倒閉潮；而你最近又獲內地委任為國家發改委轄下嘅改革理事會副理事，睇番勞動法嘅問題，你其實係咪都唔贊成政府立法限制勞資兩方議訂合約條件嘅自由？

葉：唔可以講我完全唔贊成，因為世界好多地方都有，譬如最低工資，我哋（香港）就嚟討論立法啦，都係用法例限定市場工資，咁歐洲、英美，好多國家都有喇。

不過去年底喺網誌入邊，你曾經話對立法有所懷疑噃。

葉：最低工資，如果喺經濟理論上，係干預市場，本來如果純粹係經濟理論，我會反對，但喺我競選咗幾個月之後……我就真係發覺貧富真係好懸殊，好多工作工資真係好低，咁𠵱家連商界都唔反對喇。

李：即係你已經放棄咗反對最低工資？

葉：我放棄反對㗎喇……

李：對好多人我都問過同樣嘅問題—要攞出乜嘢證據，先可以說服到你去反對最低工資？

葉：我諗??家唔係反唔反對最低工資嘅問題，因為特首已經話咗立法啦，而且立法會好多同事都贊成立法，係要參與呢個立法過程，點樣喺制訂最低工資嘅水平同執行之上，做得最好

咁你知唔知內地勞動法搞到勞資雙方嘅關係急劇惡化，加速咗好多港資中小企廠商嘅倒閉潮？

葉：老早就知道，我四月就帶過一個中小企團訪問北京、天津，中小企要求拜訪勞動部，但佢唔願意接見我哋，因為佢話其實已經解釋晒……其實中央政府係知道晒（有關問題），係睇佢願意作點樣嘅修改，無論係條文或者執行都好大問題，經已反映晒。

獲委任為發改委改革理事會副理事之後，你打算點幫內地開廠嘅港商？

葉：據我所知，一年有一次會開，開會我一定會上去，我亦希望透過呢個機會，了解多啲我哋國家改革經濟嘅政策，大家都明白點解會出呢啲勞動法同稅務改革，都係因為國家睇到，經濟要健康增長，一定要產業升級，唔可以成日靠做啲廉價嘅（產品），譬如牛仔褲、恤衫，每件只賺人幾個仙……

但港資企業普遍從事低增值產業並唔係佢哋嘅錯，政府更唔應該透過一啲行政手段強制產業升級，正如《蘋果批》早前訪問中小企代表佘繼泉都反映過港資廠家嘅心聲……

佘：香港大部份企業都係從事lowend（低檔）產品生產，呢個係真真正正嘅現實……三十年前國內公路冇、水冇、電冇，當其時我哋港商上去，冇科技條件、冇資金，乜嘢都冇之下，十幾年來冇路幫佢開路，冇電幫佢發電，冇水幫佢開井，呢班廠家默默地為香港同中國做咗好多嘢，心酸嘅係，𠵱家呢班廠家好多走佬都唔掂。……