文詠珊（JaniceMan）今日喺灣仔出席化妝品牌IPSA嘅全新粉底發佈活動，一身吊帶上衣，大騷纖腰，仲笑謂咁著係為咗證明佢喺內地拍劇個半月都冇肥過。

JM話：「冇乜特別肥同瘦，係黑眼圈大咗啲啲。拍劇每日瞓三、四個鐘，瞓到六個鐘已經好幸福。我有個願望，係可以瞓到自然醒，或者瞓到八個鐘已經好感恩。」

JM表示正在內地拍攝《蜀山戰記》，劇接劇博命搵人仔？JM話：「要努力啲，之前冇試過拍內地劇，可以好好磨練演技，嚟緊下半年會接兩部。」問佢會否實現買樓夢？JM話：「我話咗會幫媽咪買，年底一定實行。（一次過付款？）我都想。」