聖誕節呢個普天同慶嘅日子，唔少人都希望可以同最親嘅人渡過，不過一眾駐港中資企業負責人就慘慘豬喇，平安夜當日都要出席中聯辦主任王志民主持嘅領導班子會議，唔止要學習貫徹國家主席習近平嘅重要講話精神，仲被要求支持特首林鄭月娥嘅管治同依法施政，同林鄭「同心同行」喎！

中聯辦今日喺網頁發文，話王志民平安夜當日主持中聯辦領導班子會議，外交部駐港特派員公署特派員謝鋒同主要駐港中資企業負責人都有出席。會上唔止提到中國改革開放40年嘅光輝歷程，更加提醒中央駐港機構員工要堅定支持林鄭同特區政府依法施政、積極作為，着力發展經濟、改善民生，仲話要香港人喺「堅守『一國』之本、善用『兩制』之利」中，獲得更多幸福感喎。

會上又提到，習近平上星期喺北京會見述職嘅林鄭時，充分肯定咗林鄭係「勇於擔當、積極作為」、「堅定維護一國兩制方針同《基本法》」，要求中央駐港機構同中資企業一定要貫徹落實習近平嘅指示，同林鄭「同心、同向、同行」，確保中央喺香港嘅決策部署可以「上岸、落地、落實」咁話。