外表硬朗嘅郭少芸，異性緣比較薄弱，自1992年參加香港小姐入行後，喺佢身邊嘅男伴不多，曾經介入劉少君與周秀蘭嘅婚姻，做第三者之外，佢仲同編導鍾國強相戀，然而今年48歲嘅郭少芸，至今依然感情空白。

情路坎坷嘅郭少芸，入行初期，就因為拍劇，因為過份投入角色，唔識控制感情，同處境劇《真情》入面嘅老公劉少君，發生咗感情，介入咗男方同周秀蘭嘅婚姻。1996年3月，郭少芸就傳出同劉少君戲假情真，曾有人目擊佢哋兩個撐枱腳吃飯，且態度親暱，你餵我一啖時，我餵番你一啖的，令旁人側目。

兩位當事人例牌否認，但紙當然包唔住火，兩個月後，佢哋就俾《蘋果》踢爆喺西貢南圍同居，劉少君就向《蘋果》記者坦承與郭少芸同居關係，仲話：「因為老婆唔喺身邊至行差踏錯啫！」劉少君話老婆唔係身邊先會行差踏錯，咁居於加拿大嘅周秀蘭喺同年6月返港，美其名就話為加拿大一間大學之佛學系籌款，但相信佢係返港昅實老公，就係咁，郭少芸同劉少君嘅婚外情就無疾而終。

12年，郭少芸接受《忽然1周》專訪時，佢就咁樣形容當時呢段婚外情：「當年細路女，投入咗角色後唔識走番出嚟。依家唔同喇，拍《拳王》時我都好愛黃德斌，但之後識走番出嚟。今日再問我，任何一個有老婆嘅行埋嚟，我都會叫佢返屋企瞓。」

之後喺郭少芸口中承認嘅男友就只有編導鍾國強，99年鍾國強遇上交通意外曾一度昏迷，當時郭少芸每日到醫院探病，佢哋順理成章成為戀人。但後來因工作壓力問題，最終與鍾國強分手收場。

至於緋聞男友，郭少芸就同曾經合作《大鬧廣唱隆》嘅「大隻廣」林家棟，同2012年同《愛．回家》嘅姪仔羅天宇傳緋聞。對於同年齡相差18載嘅羅天宇傳緋聞，郭少芸就以「天方夜譚」作回應。(新聞連結： http://bit.ly/2kDjdcN )