轉會窗關閉前一刻，阿仙奴終於再度出手！明明身在羅馬嘅領隊雲格，竟然由曼聯簽入韋碧克，用嚟代替受傷嘅靚仔中鋒基奧特。韋碧克細細個就喺曼聯踢波，早前都有一段網上短片，係佢細個跟傑斯學踢波，估唔到大個仲做埋隊友㖭！
韋碧克曾經係曼聯未來希望，但短短兩年內，領隊都換咗3個，佢亦慢慢由未來希望，變成球隊第4選擇。其實韋碧克都唔係踢得好差啫，雖然把握力仲可以好啲，但話晒有速度、有身材、有走位，係差少少穩定性同信心，相信只要稍作改善，成為英格蘭首席中鋒指日可待。
尹佩斯受傷，其實係韋碧克上位嘅好機會。可惜，曼聯開季3場不勝，新領隊雲高爾實在冇太多時間磨合，一定要盡快取得成功，咁就要有個可以「即食」嘅前鋒，所以佢簽入法卡奧，放棄韋碧克，既然知道自己冇咩前途，惟有離開啦，最終就嚟到阿仙奴。雲格今次收購呢位英格蘭國腳只係用咗1,600萬鎊，今次真係平靚正！

有網民影到韋碧克代表英格蘭嘅時候，仲用緊喺曼聯時代嘅旅行袋，無論佢個心係唔係仲喺曼聯度都好，佢都已經係阿仙奴嘅人，今個星期六主場對曼城，一定會踢得更加落力。以佢剛喺國家隊入兩球嘅腳風，分分鐘又有「士哥」，加上季初社區盾阿仙奴曾經大勝曼城，心理上會有優勢，主場出擊，有信心唔使輸，今場阿仙奴應該可以贏2:1。
LULU
不懂踢波愛睇波