戲如人生，近排好多人昅實亞視高層人事變動呢台戲，張永霖一開始同王維基稱兄道弟拍檔入主，跟住一齊向亞視員工開座談會一唱一和，一開始戲份佔多數嘅王維基做主角，以為張永霖只係綠葉，點知劇情發展落去先知，主角同大贏家原來係青樓張。唔聲唔聲嚇你一驚，張永霖當日喺記者會宣佈「已接受王維基請辭」一幕，係咁講一句已經將成個古仔發展方向，改變到佢預定嘅情節。

未睇報紙所以唔答

張永霖噚日去立法會，再次發揮過人演技。議員追問查家係咪最多畀多3億為亞視吊命時，張永霖竟然話自己未睇報紙，所以以未睇過有關消息為由，話唔方便評論。正當議員質疑佢去立法會都唔做功課，佢就話自己平日好早睇報紙，只係噚日由於要預備出席立法會，所以冇睇到。咁嘅理由都講得出，議員即場爆笑。
笑位只係伏線，張永霖又示範佢駕馭大局嘅能力，講咗個全場爆笑嘅爛gag，就係王維基唔係俾人炒魷魚。此語一出，一向處變不驚嘅公民黨余若薇，即時面露難以置信神情，話王維基曾發聲明話自己冇請辭，但張永霖當日就單方面宣佈王已經辭咗職，「700萬市民睇呢件事，有邊個會覺得王維基唔係俾人炒？」再睇番張永霖用誠懇同無知嘅表情話，「冇收過嚟自中聯辦同中央嘅干預」，聽完除咗笑之外，真係接唔到口。

想拍戲扮演胡蘭成

去完立法會，張永霖噚晚帶住女伴睇《梅蘭芳》首映。佢話對中國近代史好有興趣，「我會同楊生（楊受成）講，叫佢拍張愛玲，我想做胡蘭成。我會寫埋劇本，不過冇演戲經驗，只係拍過廣告。」張永霖想挑戰擔演呢位漢奸才子，要發揮角色嘅複雜內心戲，一啲都難佢唔到，事關佢嘅演技喺日常生活滲出嚟。記者問到佢同王維基仲係咪兄弟，佢話：「仍然係朋友，係咪稱兄道弟好難講。」好戲！
睇完全日演技大晒冷，雖然張永霖仲未正式推出作品，但八方都要提前頒幾個演藝大獎畀佢，表揚佢真係一位不可多得嘅演技派視帝。

mailto:[email protected]