一連五日復活節兼清明長假期又到，假期新聞通常較為淡靜，八方班行家呢幾日都四出搵罐頭，即係做啲古仔留喺假期出街。房署都算唔話得，為行家搵咗兩隻古仔，但就大細超，電台、電視台可以早一日出街，報紙行家要等一日先畀見報。
通常，叫得做罐頭古仔，電台、電視台同報紙應該同一日出街，房署呢個不平等安排令班報紙行家嬲到震，一輪電話密議後得出兩個共識，一係一齊唔去，二係照去，但做完之後第二日即刻見報。不過房署消息好靈通，知道報紙行家想造反，最後死死氣話一視同仁，所有傳媒可以同一日將古仔出街。八方不禁想贈房署兩句：「早知今日，何必當初呢？」