超人、蜘蛛俠、變型俠醫呢類英雄大家聽得多，但你又聽過「持力奇俠」Performan未？呢個英雄，單聽個名就知勁吧！其實係由安全套品牌「杜蕾斯」創造出嚟。

今日杜蕾斯喺報章落嘅廣告，十足十電影廣告咁，仲雞乸咁大隻字寫住「發揮超人耐力　化身強者角色」，語帶雙關，修辭一流！圖片中嘅IFC上，更見到一個光環，係咩？自己領悟吧！

睇番資料，《持力奇俠》全長約11分鐘嘅微電影已經可以網上睇到，內容大概係講Performan會「與神秘美少女以超持久威力拯救世界」。至於到底呢位Performan威力有幾「超持久」？就要自己上網睇片啦。

杜蕾斯呢個品牌大家好熟，但其實母公司ReckittBenckiser亦非常把炮。ReckittBenckiser於英國倫敦上市，為富時100指數成份股之一，旗下品牌包括滴露（Dettol）、史立消（Strepsils）、Veet、AirWick、爽健Scholl等，目前市值達335.76億英磅。

講到ReckittBenckiser股價，上升動力亦好持久，股價自2009年起，反覆炒高，單係以2012年至今，累積已升近55%，現報45.78英磅。