冇耐前先講過郭富城嘅愛駒「愛的呼喚」，臨近季尾仍操到火紅火綠，日前試泥地大閘前速後勁兼備跑第一，估計會喺唞暑前上陣。話口未完，練馬師方嘉柏就同佢報名今期泥地賽，可惜只做後備。點解呢？因為要讓路畀廐侶「豪逸」囉！「愛的呼喚」咁弗，方嘉柏都唔畀佢做出賽首選，反映「豪逸」嘅機會，喺廐主心目中應該更高。
「豪逸」馬主呂卓恒係喜萬年大酒樓老闆呂少文嘅公子，呂少文亦係澳門馬會大董，佢哋下半季運氣唔錯，「豪逸」同呂少文自己嘅團喜馬「喜逸」，都能取勝；呢對馬將於禮拜三分途上陣。先睇「豪逸」，上仗初跑泥地，初戴眼罩隻馬未完全適應有啲急，都放入第二僅敗，泥地性能肯定極佳，今次用見習生呂卓賢負磅大減，又有三檔，補中一啲都唔奇。
至於「喜逸」，近四戰攞到兩冠一季，四歲馬不斷進步中，同父嘅「三和福將」泥地識飛咁滯，「喜逸」初跑泥地又點會唔掂？如果「逸」系兩駒贏晒，睇嚟呂少文真係要豪一次，請晒班老友去喜萬年食乳豬。