前晚9點幾警方喺油麻地掃毒，截查一部毒品快餐車，當時車上男子仲想開車走，點知畀10個阿Sir足足20條手臂重重包圍走唔甩，阿Sir大聲叫車上嘅人開車門落車，結果拘捕咗兩個分別23歲同28歲嘅青年，佢哋涉嫌販毒俾阿Sir押返署調查。

大嗌「開車門呀」

市民洪先生當時去朋友屋企食飯，咁啱就見到警方喺油麻地偉晴街掃毒，截咗一部目標私家車。佢話突然間聽到樓下好嘈，望落樓下見到成10個人圍住喺度拍打部車，仲以為有人打交。
當時洪先生話聽到有人大聲嗌：「開車門呀!」佢睇睇吓先知道原來係「警察做嘢」。
洪先生仲話阿Sir將個廿零歲嘅青年拉落車，將佢㩒地制服，佢又見到之後警察搜車。由於現場有好多食肆、酒吧，當時仲幾旺，所以好多人圍觀。
警方話行動中，油尖警區特別職務隊人員喺車內搵到約重90克懷疑可卡因，市值約11萬2千蚊。警員亦喺該兩名青年身上搵到約5萬5千蚊現金，一併帶署調查。