來自南亞、菲國同強國，仲有土炮「阿婆」做代表嘅排隊黨令五月天fans怨聲載道，明明真心來買飛赴每年五月之約，結果變成要同排隊黨爭位企爭飛買，被恐嚇被打尖，同當日LadyGaGa來港開騷、各路黃牛爭食場面無異致。有網民直指，有啲排隊黨肆無忌憚、喺警察面前分錢數飛，好似當咗警察係紙板咁喎。

來自將軍澳嘅陳先生拎住白卡紙寫住反黃牛，佢話同幾朋友排咗兩日，之前數過前排只係得三十幾人，點知到噚日，神奇魔法出現了，前面無聲無息唔知由邊度多咗十幾廿人出嚟。見鬼都冇見排隊黨咁驚呀真係!

今次主辦單位限制每人買4張，但記者今日於中環大會堂所見，唔少人都係買完飛再翻兜排隊。陳先生呼籲大家唔好買黃牛，唔好鼓勵炒風，佢話:「其實有投訴有報警好多次0架喇，都係去文娛中心買飛好啲，好似通利琴行同商場排隊買飛，真係完全冇管理。我知道將軍澳有朋友係有報警，因為商場冇安排，明明排緊隊前面突然塞咗十幾人，又恐嚇五月天歌迷。」

陳先生話，已經放棄前排坐位，只求「一飛入場」。會唔會因為咁而唔想睇？陳先生話:「感覺越嚟越似變成LadyGaGa炒黃牛咁，連唔關事嘅師奶阿婆都嚟埋，不過我哋盡量買到就買多啲，買到廿幾行，用正價賣番俾啲歌迷。因為今年fansclub每日都只係得100張飛，好多fans都買唔到。」

另有一個戴口罩嘅香港女fans，就投訴大會堂冇安排:「其他地方前一晚都有保安陪一晚，第二日派籌，今日呢度乜都冇。」



爛片界盛事、由本報娛樂版舉辦嘅第九屆「金話梅電影選舉」（GoldenPlum）又嚟喇！請即click入網址投票，喺香港電影金像獎舉行之前選出爛片之霸！
↓↓↓
http://campaign.appledaily.com/goldenplum