俗語話同行如敵國，之不過，世界上沒有永遠嘅敵人，自從03年CEPA落實後，幾間香江品牌嘅珠寶金飾公司揼本到大陸插旗，加埋開咗過千間零售店，有份飲頭啖湯嘅六福集團（590）CEO黃偉常話，其實行內競爭對手都係好朋友，平時佢一搵到靚舖位，會叫埋彤叔嘅周大福，同埋周生生等行家，一齊開喺隔籬左右，帶旺人流，實行齊齊北上搵真銀。
今年香江零售業境況係好係壞冇人知，無論神州能否「保八」，話晒都叫做有增長啦，所以黃偉常話未來一年唔會改變大陸開店步伐，每年差唔多開10間自營店，相信祖國可以容納上千間六福㖭（舊年9月底有384間零售店）﹗

六福CEO後繼有人

另外，黃偉常位公子黃浩龍，同埋千金黃蘭詩喺六福都打滾咗幾年，終於喺舊年「開學日」獲委任為執行董事，阿爸話希望啲仔女可以乜嘢都學吓，不過佢本人就冇諗住因為後繼有人而退休，打算學到老做到老喎！