吳彥祖同高圓圓身穿結婚禮服，為寰亞電影《單身男女2》喺一間五星級酒店內拍攝結婚戲，不過完美婚禮卻被穿着攀爬達人造型嘅古天樂（古仔）搞破壞，古仔從大廈外牆爬入婚禮現場搶婚。

雖然面對「準老婆」高圓圓被搶走危機，但吳彥祖仍然發揮「火星男」完美性格，眼見古天樂有生命危險，冇攀爬經驗嘅佢，奮不顧身徒手爬上三十幾呎高牆，由於只係裝飾牆，所以並唔鞏固，搖搖欲墜。而戲中高圓圓嘅哥哥周渝民(仔仔)尾隨爬牆幫手，佢與同場嘅楊千嬅，以及現場近百名賓客見狀，都不禁「O嘴」，替佢哋捏一把汗。

而導演杜琪峯出名要求高，佢仲親身上陣，一方面試爬上牆，測試裝飾牆鞏固程度，另一方面親身亦從不同角度拍攝效果，仲出動新款遙控攝影機﹐從高角度拍攝。

今次電影拍攝第二集，令高圓圓又再跌入感情交叉點，佢爆料指杜sir刻意隱瞞劇情：「導演一直都保持神秘，不想影響我的演出，直至昨天我才終於知道結局。有時候我也想，作為女主角真是難選擇!」吳彥祖就搭訕話：「其實唔難，當然選我啦！」高圓圓笑說：「哈哈，對，你這麼完美！但女生總會有短路或者迷茫的時候，所以也會想與古天樂一起的衝動！」

雖然戲中吳彥祖性格完美，就算情敵古天樂搶婚，不但冇嬲，仲關心對方安危，但原來吳彥祖卻嫌「火星男」太完美：「戲裡我係個大好人，但『火星男』太完美，反而畀女朋友好大壓力，所以我唔會係一個『火星男』。」而高圓圓亦表示，現實生活中要一場平淡而穩定愛情。

而古天樂要留喺大廈外及屋頂拍攝攀爬戲份，與吳彥祖及高圓圓冇碰面，佢話：「今日我嚟搶婚，喺呢集我同楊千嬅及高圓圓有一條感情線，而千嬅嘅出現，令我認定心裡面係咪真係咁鍾意圓圓？！」