胡子彤同爸爸感情要好，一直以嚟都以朋友方式相處，日前，兩父子仲玩埋電影，胡子彤教爸爸講電影《點五步》其中一句經典對白「個死老鬼有冇攞住支槍，指住你個頭？」胡子彤指運動係維繫一家人嘅感情。問到有冇難忘事﹖胡子彤話：「老竇係一個好就得人，平時唔多講嘢，但有次佢鬧阿哥，我都嚇咗一跳。」

難道胡子彤冇試過反叛期﹖佢話：「真係冇，因為阿哥大我8年，佢係我一個幾重要嘅模仿對象，基本上佢做乜嘢，我都好想跟住去做，所以佢淨係練波打波，變咗我都係，我都係練波打波，最多中學嘅時候同朋友出下街，所以都冇大事闖禍。」胡爸爸都表示對囝囝好放心。

問到咁多年嚟點樣慶祝父親節？胡子彤突然苦笑，胡爸爸就話：「今年請咗我哋食飯。」胡子彤表示：「以前都會一齊食飯，但今年我要求請大家食，因為以前做全職教波，收入係好唔穩定，我試過被拖糧拖到一年半都冇糧出，每個月只係得兩、三千蚊生活，嗰件事係隨住自己越嚟越大，你知道責任越嚟越重，但自己能力又未到，自己會有少少慚愧，o依家做演員，多咗個身份，收入、工作開始慢慢穩定，覺得自己係時候要對屋企、對爸爸媽媽負番責任。」

雖然胡子彤識得煮番幾味，不過佢笑指媽媽廚藝了得，無謂獻醜，佢話：「我哋每次入廚房，阿媽都叫我哋出番去，唔好搞佢廚房。」當初知道胡子彤發展演藝事業，胡爸爸都好擔心，胡爸爸話：「我驚佢學壞，娛樂圈係一個大染缸，驚佢會受到啲引誘，所以經常會同佢傾偈。」

採訪：黃曉妍
拍片：馮嘉銘
服裝：Levi's_hongkong

想隨時獲得更多親子資訊，快啲like Easy PaMa Facebook啦！
https://goo.gl/1qWM8g