喺特首林鄭治下做局長，認真唔容易，日日做到無停手，放假都要OT集思，平時又要拍片諗下新點子。好似發展局局長黃偉綸咁吖，忙搞中環摩天輪之際，仍然拍片hardsell旗下刊物。佢喺新鮮出爐嘅短片中，介紹返地政總署測繪處編製嘅最新版航空照片集《飛越香港20載》，帶讀者穿梭香港廿年路上不同景致。

有人可能奇怪，點解相集內今昔對比嘅相片無論拍攝位置、角度同顏色都咁近？原來係測繪處喺揀相時要特別下功夫，例如要喺數以萬計檔案相中搵適合對比照，亦要微調顏色同光暗，等市民感受當中變化等。總技術主任（攝製）陳雲亮喺短片中透露，測繪處而家有成20幾台不同機種嘅無人駕駛飛機，由受過專業訓練嘅同事操作，航空攝影果真與時並進。

黃偉綸就話最留意「保育」嘅章節，強調身處同一個「香港地」，從來冇重發展、輕保育、棄郊野嘅動機，又幾識借題發揮喎！