香港路窄車多，意外自然少不免。警務處數字顯示，單計2017年臨時數字，全港共發生14,300宗交通意外，即係平均每日都有幾十宗大大小小不同事故，交通部日日做到冇停手是常識吧。雖然意外好常見，又或者只係警察設路障截吓車，途經現場嘅司機們都慣性鍾意慢車「關心」吓，咩車撞咗、有冇人受傷、捉到咩人、係咪又「勾車」，簡而言之，即係八卦。

近日就有一組瘋傳網絡嘅車cam短片，事發地點相信係新界北粉嶺公路古洞一帶，往元朗方向有警察封起兩條行車線，唔知係撞完車定做完路障截查；而向粉嶺方向嘅車cam片主，就因為前車突然急煞，片主收唔切撞上前車車尾。可憐片主後車同樣停唔切，向後車cam清晰拍低尾隨私家車撞上片主部車而「爆氣袋」一幕，仲見到後車司機開門落車，手掩小腹彎晒腰呻痛，陰功豬。

不過，片主部車被推前之後，有眼利網民就發現此時入鏡嘅，仲有對面線收拾緊封路用嘅「雪糕筒」嘅交通警，呢頭幾近收工，嗰頭就目睹對頭線又撞過，一時情不自禁，右手向上一揚，又開始搬返啲「雪糕筒」出嚟。唔少網民對阿sir個自然反應深表同情，仲幫阿sir配埋音，「你班xx畀我唞吓得唔得」。

記住喇，揸車記得唔好分心八卦，仲要預留適當行車距離，如果唔係就好似片主咁變三文治，車毀事小，腰痛頸痛就手尾長㗎喇。

【識睇睇留言】
Lui Kim：恭喜！得償所願，依家可以慢慢望，望到夠
Benson Tang：後面觀賞完對面嘅畫面，鏡頭一轉就到自己
Ambrose Leung：Airbag爆出嚟嗰嘢好睇過煙花，不過好在人好似無事
Chong Ping：拎返雪糕筒放地下嗰嘢好大力
Man Ce：呢個手勢充滿著香港嘅情懷
Sum Lo：個阿sir好正，佢應該講緊粗口
Sandy Chau：掛住八卦的後果，阻亞sir收工
KA Cha：打工仔表示明白呀Sir心情
Kelvin Lam：呀sir隻手「頂！又要做多單」

《蘋果》沙士15周年系列網站，正式登場：
https://hk.feature.appledaily.com/sars15/