明日，立法會會為批出四川捐款作出第一次投票。香港政府初步決定捐款畀四川災民，上限為一百億。香港人希望呢一百億，可以為四川人民帶嚟幸福，就當呢個係隻一百億「救城木馬」咁，送畀四川人。撰文：孫柏文

呢一百億其實令好多香港人骨子裏感到不安，雖然香港人嘅核心價值係唔怕嘥錢，因為香港人已見慣，不過嘥都要嘥得清清楚楚。為咗令捐款變得井井有條、透明度高，香港人送呢隻一百億救城木馬，一定要喺呢隻木馬入面裝禮物，為四川人帶嚟捐款之餘，仲要為佢哋帶嚟一個希望。

對於四川救災，特區政府曾先後派消防處、衞生署、食環署等部門去支援。𠵱家災後重建，我哋出錢之餘亦應該利用香港特有嘅寶物去支援。其中香港特有嘅寶物，就係我哋能令政府廉潔嘅系統。
所以《蘋果批》希望，特區政府就用嗰一百億做budget，派出調查員團體，令四川人歡呼：「謝謝香港！好在四川都有ICAC（廉政公署）！」相信香港人聽到時，都會好感動咁話：「抵！」

《蘋果批》一直堅信要強政厲治。要做到，就一定要做好反貪污同監察啲官點樣用錢。《蘋果批》又相信香港要積極貢獻畀祖國同胞，大家如果覺得ICAC為祖國其他地方嘅人民出力，會受到批評，亦冇前科，大家應該即刻搭船過澳門。去到，你就會聽到：「歐文龍案，好在澳門都有香港ICAC！」

其實當年寫基本法時，已故國家領導人鄧小平已預見到，內地喺使用公家錢透明度方面，未有任何級別嘅政府能達香港人嘅標準。要香港政府上繳港人公帑，一定會分化香港人，減低香港同胞擁抱祖國嘅熱誠。所以鄧小平先將稅款不用上繳嘅「香港要有獨立財政」條文寫入基本法，以免有擦鞋仔強挾「愛國」，分化港人。

鄧小平：香港有些愚忠「愛國」同胞，說不支持撥款就是不「愛國」。我就不支持撥款了，所以基本法才這樣子寫。難道我不愛國嗎？設計對白