韓劇《秘密花園》男星玄彬去年底被爆同《未生》女星姜素拉撻着，兩人冇收收埋埋，極速認愛，不過原來佢哋拍拖日子唔長，只係得短短半個月，但咁快承認拍拖，有報道指係同南韓總統朴槿惠有關。

根據前日播出嘅ChannelA《聽到傳聞》節目指，主持人洪錫天話如果話總統鍾意邊個明星嘅話，就一定係玄彬，事關大家都知朴槿惠係《秘密花園》嘅粉絲，早前被爆朴槿惠用《秘密花園》女主角河智苑喺劇中嘅名「吉羅琳」到韓國Chaum醫院享用VIP服務，足見佢係劇集粉絲。而喺早年嘅訪問中，朴槿惠都話自己最鍾意嘅男星係玄彬。

而節目上一位元記者就指玄彬因為受到朴槿惠嘅影響，因為自己係朴槿惠鍾意嘅演員：「因為咁樣，即使同姜素拉交往咗只係15日，佢都爽快地承認戀情。分明係進行咗一定風險管理先咁快認愛。」

另外，由玄彬、允兒、劉海鎮等主演嘅新片《共助》將於本周三喺韓國上映，玄彬今日受訪時大方提及女友，對於咁快認拍拖，佢話因為係事實關係，但唔代表佢想公開自己嘅私生活。至於點解女友唔去捧佢首映場，佢就話因為姜素拉有其他行程，所以先冇現身。